KRALENDIJK- Fundashon Alzheimer Bonaire (FAB) a kuminsá Luna Mundial di Alzheimer ku diferente aktividat enfoká riba konsientisashon, rekonosementu di demensia i sosten pa personanan ku demensia i nan famia. E luna a habri ku un misa na Parokia La Birgen di Coromoto na Antriol, kaminda tambe a para ketu na FAB su 15 aña di eksistensia.
Durante siman FAB a organisá un tayer na Sentro di Bario Nikiboko tokante rekonosementu di señalnan di demensia. Sikólogo di hende grandi Marije Veenstra i direktor di FAB i casemanager di demensia Henna Winklaar a enfatisá ku ta importante pa tuma señalnan na serio i konsultá dòkter di kas na tempu. Diagnóstiko na tempu por hasi posibel pa haña sosten i ayudo mas lihé.
Programa a sigui ku un Brein Café na Captain Don’s Habitat, kaminda Veenstra i spesialista Jop Peelen a papia tokante importansia di un diagnóstiko di demensia. Djasabra, FAB i Biblioteka Públiko Boneiru a organisá un charla ku Veenstra i Carlos Martis, ku atenshon pa kuido propio, maneho di strès i rekreo.
Djabièrnè 11 di sèptèmber programa ta sigui na Biblioteka Públiko Boneiru ku un anochi di informashon bou di guia di life coach Shantha Provence, enfoká riba resiliensia, motivashon i atenshon pa bo mes.