KRALENDIJK – Direktorado di Supervishon i Mantenshon di Lei (DT&H) a kuminsá for di 20 di yüli 2026 ku kontròlnan integral i riguroso riba establesimentunan ku ta bende produkto alimentisio. Produkto alimentisio ta referí na tur tipo di kuminda i bibida ku ta destiná pa konsumo humano.
E kontròlnan ta forma parti di e programa di ehekushon pa 2026, basá riba resultado di e análisis di riesgo di DT&H i e maneho di supervishon i mantenshon di lei. Ta ehekutá nan konforme e leinan i regulashonnan vigente pa garantisá ku ta bende produktonan alimentisio den un kondishon sigur i di bon kalidat na e konsumidó.
Durante e inspekshonnan, no ta kontrolá solamente kalidat i seguridat di produktonan alimentisio, pero tambe e situashon higiéniko di e establesimentunan, kontròl di vèktor, aspektonan di medio ambiente i si e establesimentu ta disponé di tur pèrmit nesesario pa operá. Ademas, ta kontrolá si e produktonan ta kumpli ku e eksigensianan tokante etikèt, konforme e Dekreto etikèt di produktonan alimentisio BES.
Promé ku e kontròlnan a kuminsá, tur establesimentu a risibí un karta di informashon ku ta duna splikashon tokante meta di e proyekto,e base legal di e kontròlnan i e posibel konsekuensianan i sankshonnan den kaso di no kumpli ku e reglanan. Pa yuda empresarionan i konsumidónan komprondé e reglanan mihó, DT&H lo publiká un seri di video informativo tokante diferente tópiko relashoná ku seguridat di produkto alimentisio.
E inspektornan lo kontinuá ku e kontròlnan den tur bario na Boneiru i lo bishitá supermerkadonan, minimarketnan i otro establesimentunan ku ta bende produkto alimentisio. Ku esaki, DT&H ta sigui komprometé na protehá salú públiko i salvaguardiá bienestar di nos komunidat.
Por mèldu iregularidat
Si bo nota kualke iregularidat den un establesimentu ku ta bende produkto alimentisio, bo por mèldu esaki na Direktorado di Supervishon i Mantenshon di Lei via imeil bisami_th@bonairegov.com.