PANAMA – E temblor pisá ku a afektá Panama djabièrnè, a okashoná heridanan leve na 27 persona. Tambe a hasi daño na mas ku 400 edifisio, entre otro kas-, skol-, hòspital- i misanan. Segun sifranan preliminar di outoridatnan di Panamá no tin morto.
Esei ta sali na kla den e notisia mas resien ku agensia di notisia Panameo EFE a publiká djasabra. E temblor tabatin un magnitut di 7,7 i tabatin un di dos temblor pisá su tras i desena di post-sismo. E daño ta konsentrá spesialmente den e provinsianan Veraguas, Herrera, Los Santos i Coclé.
Di e edifisionan afektá tin 142 kas i 188 institushonnan edukativo segun e sifranan preliminar. Hòspitalnan, edifisionan di gobièrnu, brùg- i kamindanan tambe a sufri daño. Den diferente área hendenan mester a bandoná nan kas of edifisio komo medida di prekoushon. A evakuá alrededor di 300 persona.
Edifisionan históriko afektá
E temblor a afektá edifisionan históriko tambe. Misa San Atanasio den provinsia Los Santos, ku tin e státùs di patrimonio históriko kultural, a basha aden parsialmente òf pa gran parti. Na Penonomé tambe a informá di daño na edifisionan públiko i hotel Dos Continentes.
E daño na e infrastruktura tabata motibu tambe pa problema na diferente sitio. Tabata difísil pa alkansá sierto komunidat pasobra kaminda- i brùgnan a sufri daño. Tambe a informá di daño na plantanan di awa i institushonnan di kuido.
Di dos temblor pisá i post-sismonan
E promé temblor a tuma lugá djabièrnè na kosta sùit di Panama i tabatin segun servisio geológiko Merikano USGS finalmente un magnitut di 7,7. Despues a sigui un di dos temblor pisá ku un magnitut di 6,6. Sismólogonan a registrá despues mas ku 45 post-sismo.
E teremotonan a kondusí na evakuashonnan i intrankilidat grandi bou di habitantenan. Na Siudat di Panamá hendenan a bandoná edifisionan komo medida di prekoushon. Outoridatnan a hasi apelshon riba e pueblo pa keda kalmo mientras ku servisionan di emergensia ta evaluando e daño. A sera aeropuerto Tocumen temporalmente, pero despues a reanudá e aktividatnan. Segun informashonnan Kanal di Panama aparentemente no a sufri konsekuensia.
Despues di e temblor a emití un atvertensia di tsunami tambe pa partinan di kosta Pasífiko. Despues a hala e atvertensia aki aden.
Outoridatnan ta kontinuá ku e inspekshonnan pa determiná e tamaño total di e daño. Ounke ku te ku awor no a raportá víktima mortal, e saldo por kambia ainda mientras ta kontrolá mas área.
Riba www.bonairecrisis.com no a hasi menshon di e temblor i eventual konsekuensia pa Boneiru.