Imaginá bo. Bo ta den Tweede Kamer na nòmber di PVV i bo ta pensa di por pèrmití bo mes pa duna gobièrnu di Boneiru un skual.
Na luna di yüni último e mener aki a haña ta nesesario di konta ku tur e islanan Karibense maksimalmente lo bal ún euro, si pone nan na benta riba Marktplaats.
El a yama e gobernantenan riba e isla Diputadonan di Hamaka. Na su harí falsu presumido por a mira ku e tabata den su ehehe ku e hayasgo aki.
Durante e debate tokante e presupuesto di Relashonnan den Reino den Tweede Kamer señor Elmar Vlottes a logra e siman aki un punto kulminante nobo den su karera. Sin duda el a sa di trese dilanti ku Den Haag mester pone Boneiru bou di kuratela. Mester delegá outoridat riba e isla. Sí, na Den Haag.
Ku señor Vlottes ta sugerí tal paso radikal, no ta asina straño. PVV ta unabes e partido di entregá.
Tuma e ròl di e partido aki den Gabinete Schoof. E gabinete aki tabatin mester di apénas dos aña pa hasi e trabou.
Wak por ehèmpel señora Agema. El a bira minister di Salubridat, Bienestar i Deporte (VWS). Den poko tempu tur problema den hòspitalnan den Hulanda Europeo a disparsé. I pashèntnan tabata na kas promé ku a interná nan mes.
Señora ta preferá awor di bira alkaldesa pa mustra ku e por pensa mas chikitu tambe.
Òf tuma señora Faber, minister di Asilo i Migrashon den kaso Schoof. El a hasi su mes di mas dentro di un par di luna: bo no por a mira niun buskadó di asilo mas.
Despues di su enkargo di minister señora Faber a skirbi un buki ku e título signifikativo Nan no ta kita mi balor. Típiko p’e i su partido.
Òf tuma De Madlener, minister di Infrastruktura i Obranan Públiko. Djesun luna e mener aki tabata na timon. Un periodo kaminda el a sa di hala tur problema logístiko rondó di konstrukshon di karetera, mantenshon di brùgnan i gestion di awa un banda.
Òf wak Ingrid Coenradie, sekretario di estado di Hustisia i Seguridat, un hende muhé di akshon ku promé komo miembro di Leefbaar Rotterdam a sa di saka e siudat for di problema. Pa seguidamente modernisá ministerio di Hustisia den representashon di PVV. Awor aki señora ta den Tweede Kamer den representashon di JA21.
Ku e tabata tambe miembro di direktiva i sekretaria di VVD na Tiel di 2009 te 2011 ta demostrá ku señora Coenradie ta ataká e komunidat ku un rumbo fiho i di prinsipio. Den sentido positivo natural.
Ban bèk señor Vlottes. Un hòmber ku un rumbo transparente. Den 2008 el a kuminsá komo stazjèr serka PVV. Despues el a bira miembro di Parlamentu Provinsial den provinsia Gelderland i koloboradó pa frakshon den Tweede Kamer
Señor Vlottes ta biba na Apeldoorn. I p’esei e sa kiko ta biba den e pais aki.
‘Mi ta biaha normal ku outo bai bini. E ta faktibel, ounke bo ta mira ku e preshon den fila ta oumentá i esei ta birando pió. Mi ta konstatá tur dia ku mester di mas asfalt.’
I asina bo tin banda di diputadonan di hamaka, un pegadó di asfalt i di pelucho.
Desde 2015 Auke van der Berg ta skirbi riba su blog personal Ikki’s eiland kaminda el a kompartí mientrastantu mas ku 800 storia. Su promé buki ‘Ikki’s eiland. E muska grandi di reino I’.