KRALENDIJK – E blikiamentu pisá di koral di e último añanan a indusí Reef Renewal Foundation Bonaire (RRFB) pa sigui adaptá su strategia. Segun gerente operashonal Ernst Noyons ta wak mas mihó kua koral ta sobrebibí kalor ekstremo i malesanan i ki karakterístika e koralnan aki tin.
“Nos a haña slanan duru riba e ref. E pregunta ta kon nos por siña di esei i enfrent’é positivamente”, Noyons ta bisa den un kòmbersashon na okashon di e relato anual 2025. Segun Noyons a mira diferensianan grandi entre variantenan genétiko di koral.
“Ku e blikiamentu nos ta mira un diferensia grandi den sobrebibensia. Sierto koral no a sobrebibí, pero otro si i nan ta presta diferente na diferente sitio. Nos ta mira pues ku sierto koral por ku e kalor.”
Karga di kalor
RRFB ta konsentrá p’esei enfátikamente riba koralnan ku a sobrebibí un karga di kalor grandi. Noyons ta menshoná e asina yamá genotiponan, diferente variantenan dentro di un espesie ku ta diferensiá genétikamente.
Na mes momento e organisashon no ke konservá solamente e koralnan ku ta mas resistente kontra kalor. Segun Noyos koralnan ku ta resistente kontra kalor por ta mas sensibel pa malesa. “P’esei no tin sentido pa konsentrá solamente riba koralnan resistente kontra kalor. Bo ke tin tur kos na bo alkanse, di moda ku bo tin un diversidat mas grandi posibel.”
Segun Noyons e diversidat genétiko mester engrandesé e resistensia di e ref. Diferente variante di koral tin diferente karakterístika i pa e motibu ei por reakshoná diferente riba kalor, malesa i otro sirkumstansia.
Èksito na 2026
Un ehèmpel di un aserkamentu nobo ta e ampliashon di e trabounan di rekuperashon na Petrie’s Spillar. Einan ta transplantá fuera di koral staghorn tambe koral elkhorn, boulder i brain. Noyons ta yama e sitio un prueba pa wak kon por pone diferente sorto riba ún sitio di rekuperashon.
Den un área anterior kaminda a transplantá kasi 4.000 koral staghorn ta midi segun Noyons un sobrebibensia di 91 porshento. E ta yama e desaroyo einan un éksito grandi.
Segun Noyons RRFB ta wak mas e efekto di rekuperashon di e sistema eko kompleto. Segun Noyons no ta trata solamente di e kantidat di koral ku ta transplantá. “Kiko un proyekto di rekuperashon asina ta trese bèk? Bo ta wak e piskánan ku ta saka probecho, e bestianan invertebrá ku ta regresá i e biomasa ku bo ta krea.”
Na un sitio di rekuperashon a midi mientrastantu mas biomasa di piská ku na sitionan di kontrol den besindario.
Finalmente e organisashon ke desaroyá sitionan di rekuperashon kaminda ta trese diferente sorto di koral huntu. E meta no ta segun Noyons pa laga hende rekuperá e ref kompletamente, pero pa krea sirkumstansianan kaminda e ref mes por reforsá su mes atrobe.
“Nos mishon ta pa konstruí un ref ku por rekuperá su mes. Naturalesa por esei mihó ku niun hende.”