KRALENDIJK – Water- en Energiebedrijf Bonaire (WEB) i e empresa Israel Desalination Engineering (IDE Technologies) a firma un akuerdo nobo di koperashon pa un periodo inisial di sinku aña. E akuerdo ta dirigí riba ekspanshon i renobashon di instalashonnan pa produkshon di awa di bebe na Boneiru.
E firmamentu a tuma lugá dialuna na e planta di produkshon di awa di WEB na Hato. WEB i IDE tin algun tempu kaba ta kolaborá riba proyektonan individual, pero ku e akuerdo nobo nan lo amplia e koperashon pa inkluí desaroyo, diseño i realisashon di proyektonan futuro.
Demanda di awa ta sigui krese
Segun WEB, e demanda pa awa di bebe na Boneiru a oumentá ku mas di 10% pa aña durante e último añanan. Pa por sigui kumpli ku e demanda aki, e empresa a invertí den ampliashon di su kapasidat di produkshon.
Pòtret: WEB N.V. Na 2021, WEB a pone un instalashon nobo na funshon, ku despues a wordu ampliá te na un kapasidat di 7.200 meter kúbiko pa dia. Na 2024, e kapasidat a subi na 9.600 meter kúbiko pa dia.
WEB tin komo meta pa oumentá e kapasidat di produkshon te na 14.400 meter kúbiko pa dia den e próksimo kuater añanan. Esaki lo nifiká un doblamentu di kapasidat kompará ku 2021.
Pa realisá e ekspanshon, WEB ta hasi uso di un sistema modular, ku ta permití pa ampliá e kapasidat paso pa paso, dependiendo di e demanda i e desaroyo di Boneiru.