Motor di Albatros Airlines a pega kandela preparando pa ehekutá buelo pa JetAir

WILLEMSTAD/ORANJESTAD- Un buelo ku un avion di e kompania Venezolano Albatros tabata bai ehekutá komo charter pa JetAir Caribbean djarason a hañele den problema ora motor na banda robes, den e startmentu di motor, a parse di a pega na kandela.

Ya pa algun tempu JetAir ta bezig ta purbando pa kuminsá ehekutá buelonan entre Kòrsou, Boneiru i Aruba pero te asina leu tin poko suerte den e intentonan pa yega na esaki.

E insidente a sosodé djarason anochi, durante un di e promé buelonan riba e ruta ABC pa Jetair, ora avion di Albatros a start su motornan na aeropuerto di Kòrsou pa bai lanta buelo.

Preokupashon

Tin eksperto riba tereno di aviashon ku ta kere ku departamentu di aviashon di Kòrsou (CCAA) no mester a duna JetAir permit di ehekutá buelo ku un kompania Venezolano. Entre otro pa motibu di falta di dòler, pero tambe sanshonnan internashonal ta difísil pa sa ku siguridat kiko ta e situashon di seguridat i mantenshon di avionan ku registrashon Venezolano.