ORANJESTAD – A tene djaluna un avion di Aruba Airlines ku 180 pasahero na bordo na tera na Aruba despues ku na salida for di Cuba un para a dal den e avion. E pasaheronan, ku tabata rumbo pa Guyana, mester a pasa nochi na aeropuerto Reina Beatrix. Pasobra nan no tabatin e dokumentonan nesesario pa drenta Aruba, a pone 180 kòt na aeropuerto
E avion tabata na kaminda pa Guyana for di Cuba i a hasi un eskala planiá pa tènk kombustibel. Segun agensia di notisia 24ora e avion a hañ’é ku un birdstrike ora el a lanta for di Cuba.
E tripulashon a disidí di apesar di e choke sigui bula pa Aruba. Segun 24ora na Cuba no tabatin sufisiente fasilidat disponibel pa repará eventual daño na e avion.
Durante un inspekshon despues di aterisahe na Aruba a resultá ku e tapa di nanishi di e avion a sufri daño i tabata deformá. Outoridat di aviashon Arubano DCA a disidí e ora ei pa no duna pèrmit pa e avion subi atrobe. Tampoko a pèrmiti un buelo pa Merka sin pasahero pa reparashon.
Akohida di emergensia na aeropuerto
E 180 pasaheronan e ora ei no por a kontinuá nan biahe pa Guyana. Pasobra segun 24ora nan no tabata disponé di e visa nesesario, nan no por a drenta Aruba.
A involukrá e Ofisina di Maneho di Krísis Arubano (CMO) pa risibí e biaheronan ku a keda pegá. Huntu ku Krus Kòrá i personal di aeropuerto a pone 180 kòt den un espasio apart na e aeropuerto.
E pasaheronan a haña paña di kama, kusinchi i artíkulo di higiena, manera skeiru di djente i pasta di djente. Tabatin mucha i adulto mayó tambe entre e pasaheronan ku a keda pegá.
Avion remplasante
Lo a kohe e kòtnan bèk den kareda di 5’or di mainta, di manera ku e aktividatnan regular di e aeropuerto por a sigui.
E pasaheronan mester keda den e área di aeropuerto te ora ku Aruba Airlines por regla transporte remplasante. Tambe a investigá ku si e avion dañá por a sigui bula ainda despues di e reparashon.
No ta konosí ainda ki ora e pasaheronan por kontinuá nan biahe pa Guyana i kon largu e reparashon di e avion lo dura.