PLANTATION – E artista Boneriano Dillon Rannou (26) ta presentá djessinku obra di arte nobo durante su di seis eksposishon individual na Florida. Ta habri e eksposishon 25 di òktober i por bishit’é te yanüari 2027. Ku su trabou moderno kolorido Rannou ta mustra kon e ta sigui desaroyá su mes komo artista. E ta traha tambe na un proyekto ku mester trese artistanan di Aruba, Boneiru i Kòrsou mas serka di otro.
E eksposishon ta konsistí kompletamente di trabou nobo. Rannou ta kombiná arte moderno ku influensianan klásiko i ta eksperimentá ku koló, material i diferente estilo.
“E ta un evolushon posterior di mi trabou. Mi ta usa materialnan nobo i ta purba di sigui desaroyá mi mes artístikamente”, e ta konta.
Foto: Dillon Ranou Ounke Rannou ta permanesiendo na Merka, e ta biba na Boneiru. Un gran parti di e obranan nobo el a traha na Merka, pero su orígen i e bida riba e isla ta keda hunga un ròl importante den su desaroyo artístiko.
Apertura di e eksposishon ta tuma lugá dia 26 di òktober. Rannou mes lo ta presente i lo organisá un enkuentro spesial tokante su obranan. E eksposishon ta brinda e oportunidat pa presentá su arte na un públiko nobo i pone kontaktonan den e mundu internashonal di arte.
Foto: Dillon Ranou Konekshon ku mundu artístiko Karibense
Pa Rannou e eksposishon no ta trata di solamente presentá su arte. Topa personanan tambe ku un antesedente similar ta importante p’e.
“Ta bunita pa dal e stap aki i hasi konekshonnan nobo ku personanan ku tin e mésun orígen i ku konosé e mésun sentimentu di un isla”, e artista ta bisa.
Banda di su propio eksposishon Rannou ta traha na un proyekto nobo kaminda ta trese artistanan di Aruba, Boneiru i Kòrsou huntu. A pidié pa trese artistanan di e tres islanan den kontakto ku otro.
Segun Rannou falta un bon konekshon entre artistanan riba islanan ABC. E inisiativa nobo mester trese kambio den esaki i krea posibilidatnan pa traha huntu i trese arte bou di konosementu di un públiko mas grandi.
“Nan a pidimi pa uni artistanan di islanan ABC ku otro. No tabatin ègt un brùg entre nan”, e ta splika.
Foto: Dillon Ranou Arte na Boneiru
Transporte di obranan di arte pa eksposishonnan internashonal tambe tin su retonan. Spesialmente e transporte di kuadronan grandi por ta kostoso. P’esei Rannou ta saka sierto obranan for di nan leshi promé ku e despachá nan. “Mi ke gradisí Taty Frans. Mi a haña un tas grandi serka dje di manera ku mi por transportá mi arte bon”, segun e artista.
Rannou ta regresá Boneiru pronto. Einan personanan interesá por wak su trabou na Saca Bonaire, na Kaya Korona na Antriol.