WILLEMSTAD – Kòrsou ta purba sigui stimulá e kresementu fuerte di turismo for di Argentina ku un ruta dirèkt for di Buenos Aires. Kompania di aviashon Aerolíneas Argentinas ta kuminsá 2 di yanüari 2027 ku kuater buelo pa siman pa e isla. Mientrastantu Curaçao Tourist Board (CTB) a presentá e ruta nobo na sinkuenta representante di organisashonnan di biaha Argentino i media.
E konekshon ta bini na un momento ku e kantidat di turista Argentino ta oumentá fuertemente na Kòrsou. Den e promé shete lunanan di e aña aki 24.000 Argentino a bishitá e isla, un oumento di 79 porshento kompará ku e mésun periodo di aña pasá. Ku esaki Korsou a risibí den shete luna mas turista Argentino ku den henter aña 2025, ora ku a registrá 23.000 bishitante di e pais ei.
E ruta nobo mester sigui sostené e kresementu ei. Aerolíneas Argentinas ta bai bula ku un Boeing 737 MAX 8 for di aeropuerto internashonal Ezeiza na Buenos Aires. Riba djarason i djasabra e kompania ta bula sin eskala dirèkt pa Kòrsou. Riba djaluna i djaweps tin un eskala na Aruba promé.
E buelonan ta planiá temporalmente te 29 di mart 2027 i ta forma parti di e temporada di Verano Argentino. Si ta sigui despues ku e ruta, no ta konosí ainda.
Promoshon na Argentina
Pa duna atenshon na e ruta nobo, CTB a organisá un enkuentro ku e sektor di biahe Argentino. Hotèlnan i operadónan di tour a presentá nan oferta einan. Curaçao Airport Holding tambe tabata representá
Durante e enkuentro embahador Hulandes na Argentina, Mauritz Verheijden, direktor di benta Matías Leonetti di Aerolíneas Argentinas i direktor athunto Hugo Clarinda di CTB a hiba palabra entre otro.
Ku e kampaña di promoshon Kòrsou ke pèrkurá ku organisashonnan di biahe ta inkorporá e ruta nobo den nan oferta di fakansi.
Te ku awor hopi turista Argentino ta biaha via aeropuertonan internashonal pa Kòrsou, entre otro via Panama i Bogotá. E ruta nobo ta hasi e isla mas fásil aksesibel i ta ofresé habitantenan di Kòrsou un posibibildat èkstra di biahe pa Sur-Amérika.
Konekshon anterior
Ounke CTB a presentá e ruta anterior komo un primisia históriko, Aerolíneas Argentinas tabata bula na komienso di 1984 kaba segun e website speshalisá di aviashon AeroRoutes pa korto tempu pa Korsou. E kompania tabata usa e tempu ei un Boeing 707. AeroRoutes ta basa su mes riba skemanan di buelo históriko.