ALCATI – Durante e último dia di kompetensia na Turkia Tycho Smits a optené e di dos lugá den kompetensia di foil. Ku esaki e wentsùrfista di Boneiru a optené sufisiente punto pa sigurá e título mundial U-21 serka hubentut pa 2026. Riba e último mèrdia bientu a oumentá, di moda ku e foilernan por a nabegá kuater eliminashon.
Smits a lucha te na final pa e viktoria, pero bou di e sirkumstasianan e di dos lugá a resultá e máksimo ku e por a logra. Teorétikamente e resultado ei ta sufisiente pa koroná su mes komo kampion mundial U-21 foil di e Professional Windsurfers Association (PWA). E konfirmashon definitivo di e título mundial mester sigui ainda.
Tiki bientu a trese frustrashon
No tur partisipante tabatin motibu pa ta satisfecho ku e evento. Spesialmente pa e wentsùrfistanan ku a biaha pa Turkia pa kore solamente den e disiplina fin, e kompetensia tabata desepshonante. Despues di e dianan di entrenamentu nan no por a nabegá pa falta di bientu.
Esei a pèrkurá pa frustrashon serka e partisipantenan, ku a prepará nan mes riba un programa di kompetensia kompleto. Sinembargo e ambiente a keda bon si durante e evento.
Ku mas ku 130 mucha di djestres diferente pais e evento tabata bon bishitá. E organisashon a purba di entretené e hubentut fuera di e kompetensia tambe. Asina tabatin entre otro stand-up-paddleraces, un limpiesa di bich i un asina yamá Kopa di Mayor riba programma.
Temporada di wentsùrf ta yegando su fin
Despues di e evento na Turkia tin un kompetensia mas riba kalènder, ku ta tene na Miami. No ta konosí ainda kua partisipante di Boneiru lo biaha bai einan.
Pa mayoria di e wendsùrfistanan ku esaki e temporada a yega su final. Pa Smits sinembargo e temporada ta finalisá ku un resultado spesial: e título mundial U-21 den foil.