KRALENDIJK– Bonaire Internationa Airport (BIA) lo hasi trabounan di mantenshon riba e plataforma di widebody di 23 pa 28 di ougùstùs. Henter e superfisie designá pa moveshon di avion lo wòrdu proveé ku un kapa nobo di asfalt, kaminda e kapa superior eksistente lo wòrdu kita i remplasá. E trabou ta enserá un invershon di mas o ménos 1.4 mion dòler.
Durante añanan, skernan a forma den e asfalt na vários lugá komo resultado di e karga ku e plataforma di widebody ta risibí, prinsipalmente di avionnan pisá. BIA ta monitoriá e kondishon tékniko di e plataforma kontinuamente i ta hasi reparashonnan inmediato kaminda ta nesesario pa prevení mas daño i formashon di material lòs, tambe konosí komo Foreign Object Debris (FOD). Den añanan resien, e kantidat di reparashon di superfisie a oumentá gradualmente. P’esei, e tempu a yega pa hasi mantenshon riba un eskala mas grandi i renobá henter e kapa superior di e plataforma di widebody. E trabounan aki ta garantisá e kalidat i seguridat di e plataforma pa e próksimo añanan.
E trabounan lo wòrdu realisá durante seis dia i anochi pa minimalisá e impakto riba operashonnan diario di aeropuerto. E aeropuerto lo keda full operashonal durante e periodo aki. Durante e trabounan avionnan di widebody lo wòrdu stashoná riba e plataforma dilanti di e terminal.
Plannan mas aleu
Ademas, BIA ta trahando riba plannan pa e desaroyo i ekspanshon mas aleu di e área di plataforma di widebody. Aktualmente e plannan aki ta wòrdu finalisá, i lo wòrdu ehekutá den fase durante e proximo añanan. Sinembargo, e desaroyo planiá no ta kita e nesesidat pa realisá e trabounan di mantenshon aki awor, teniendo na kuenta ku e estado aktual di e plataforma. Esaki ta kontribuí na un plataforma di widebody sigur i konfiabel pa e próksimo periodo.
BIA ta gradisí su bishitantenan, partnernan di aeropuerto, i otro usuarionan pa nan komprenshon i koperashon durante ehekushon di e trabounan.