KRALENDIJK – Ocho aña pasá Thammy Albertsz a kuminsá su karera na brantwer. E meta ku e tabatin su dilanti kaba tabata grandi: un dia e ke bira komandante general. Mientrastantu esei a bira realidat. E Boneriana di 35 aña ta awor na kabes di Kuerpo di Brantwer Karibe Hulandes (BKCN).
“For di e momento ei kaba mi a bisa: un dia lo mi tin e funshon ei di komandante general”, Albertsz ta konta di e momento ku su interes pa brantwer a kuminsá di bèrdat. Esei a sosodé na 2017, durante un teambuilding di e kuerpo. El a keda impreshoná di e manera ku e koleganan tabata traha ku otro. “Semper huntu den tur situashon, e solidaridat i e ekipo. E ora ei mi a kuminsá interesá: esaki mi ke, esaki mi por i mi ta mira mi mes hasi esaki pa un tempu largu.
Promé ku esei su karera tabata bai henteramente un otro direkshon. Albertsz a finalisá su HAVO na Boneiru i a bai Kòrsou kaminda el a optené un título den Trabou Sosial. Despues el a kuminsá e estudio kriminologia na Universidat di Erasmus. E no a tèrminá e estudio ei. Na 2014 el a regresá Boneiru i a kuminsá traha na Voogdijraad komo konsehero di e Konseho.
“Mi a laga mi famia i tur kos atras”
Despues di a sera konosí ku brantwer tur kos a bai rápido. Na mart 2018 tabatin un vakatura pa e estudio di alto mando na Hulanda. Albertsz no a duda i a registrá.
“E ora ei mi mester a laga mi stabilidat atras, mi famia i mester a laga tur kos atras pa sigui invertí den mi mes, den e mundu di brantwer”, e ta bisa. Despues di un estudio di mas o ménos un aña i mei el a regresá Boneiru na 2020 komo ofisial di servisio.
Pero e ora ei tambe su meta original a keda den su kabes. Finalmente Albertsz kier a bira komandante general. P’esei el a keda sigui estudio, haña eksperensia i sigui desaroyá su mes.
For di 2022 e tabata traha huntu ku un kolega komo komandante lokal na Boneiru. Dos aña despues el a kuminsá prepará su mes mas konsiente pa un posibel siguiente stap. E tabata pasa tempu ku diferente organisashon i superiornan i a bai Den Haag pa atkirí mas konosementu di koperashon ku e ministerio.
“Mi a yena mi mes di bèrdat kompletamentu ku eksperensia i ku e ekspertisio ku ta nesesario”, e ta konta. “Di moda ku ami por ta kompletamente kapas pa solisitá ora e vakatura aki bira liber.”
Ora ku e vakatura pa komandante general a sali bèrdaderamente e aña aki, Albertsz a solisitá. El a pasa den kuater kòmbersashon, sigui pa un kòmbersashon tokante kondishonnan di trabou. Durante un bishita di trabou na Hulanda el a haña finalmente e telefon ku e lo bira e komandante general nobo.
“E ta un momento spesial”
Ku Albertsz komo un hende muhé Boneriano ta haña un funshon importante asina, ta hasi su nombramentu spesial. E mes no ke pone hopi énfasis riba e echo ku e ta hende muhé.
“E ta sigur un momento spesial. Naturalmente mi ta un hende muhé, pero mi ta mir’é di bèrdat komo un persona ku ta kapas pa asumí e funshon aki”, e ta bisa. “Huntu ku e tim mi ta bai shen porshento p’é, na interes di e kuerpo i e tres komunidatnan di Boneiru, Sint Eustatius i Saba.
Netamente su propio kaminda pa e funshon Albertsz ta usa komo mensahe pa hóbennan na Boneiru. Pasobra e ta enfatisá ku e trayekto no tabata fásil.
“No tabata un proseso fásil. Pero mi ta spera ku por mira mi komo un inspirashon pa otronan, spesialmente hóbennan.” Riba 15 di ougùstùs Albertsz tabata presis ocho aña den servisio. “A tumami ocho aña pa invertí den mi mes pa yega aki.”
Lo bini kontratempu, pero kere den bo mes
Su konseho pa hóbennan ta pa no entregá muchu lihé. “Sigui bo estudio, pone metanan pa bo mes i bai pa bo metanan. Lo bo topa kontratempu riba bo kaminda pa yega bo meta. Pero esei ta puntonan ku por hasí bo mas fuerte.”
Albertsz ta mantené un pensamentu masha simpel: “Sea bo ta gana òf bo ta siña. No tin nunka un momento ku bo ta pèrdè.” Segun e kada kontratempu por produsí finalmente algu. “Tur loke un hende ta eksperensiá riba su kaminda, ta hasi bo mas fuerte pa e siguiente stap.”
Diplomanan tambe por habri portanan despues segun e. Pero e ta kuminsá ku konfiansa den bo mes. “Kere den bo mes, di moda ku un otro tambe por kere den bo.”
P’esei e no ta mira e nombramentu komo e final di su desaroyo. “Mi no ta mir’é komo: porfin mi tin e funshon aki. Nò, mi ta mir’é hustamente komo: esaki ta e komienso di e kontinuashon di mi karera.”
“Mi famia ta aki”
Pa Albertsz ta opvio ku kada biaha e tabata bini Boneiru bèk despues di su estudio- i eksperensianan pafó di Boneiru.
“Mi mayornan ta aki, mi famia ta aki. Mi ke duna un kontribushon na e isla kaminda mi a nase i krese”, e ta konta. “Pero mientrastantu mi ta asina leu ku mi ke ta un diferensia pa otronan tambe.” Ku esaki e kemen Sint Eustatius i Saba tambe.
E deseo pa nifiká algu pa komunidat el a hañ’é fo’i kas. Su tata tabata traha komo polis i su mama den enseñansa. “Semper mi a tende ku bo mester t’ei pa e otro. Ku bo por duna un kontribushon no solamente pa hende, pero tambe pa bo isla.”
Finalmente brantwer a resultá e sitio kaminda esei a bira realidat p’e. “Semper mi tabata ke pertenesé na un servisio üniformá. Ora mi a sera konosí ku brantwer, mi a pensa: esaki mi ke, esaki mi por i ku esaki mi ke nifiká algu pa mi isla.”
No tur tres isla ta meskos
Den su funshon nobo Albertsz no ta solamente responsabel pa Boneiru. Sint Eustatius i Saba tambe ta kai bou di su responsabilidat. I ta esei ta hasi e trabou desafiante.
“Kada isla tin su propio karakter, su propio retonan i su propio ophetonan di riesgo”, e ta bisa. Segun e un diferensia importante ku Hulanda Europeo ta ku ayudo no por yega lihé di otro kaminda.
P’esei e kuerpo mester por funshoná independiente riba kada isla. “Nos mester pèrkurá ku nos ta stabil sufisiente komo kuerpo i bon ekipá ku e materialnan korekto pa por enfrentá insidentenan independientemente, sperando ayudo despues di un of dos dia.”
Sint Eustatius i Saba no ta deskonosí pa Albertsz. El a traha mas biaha einan i tabata desempeñá un puesto direktivo temporalmente.
“E kultura, e hende- i e koleganan konosé mi bon i robes pa drechi tambe”, e ta bisa. “E no ta deskonosí p’ami. Solamente mi ta den un otro funshon awor. I huntu ku e tim mi ke ta e diferensia pa e kuerpo.”