KRALENDIJK – ACE Foundation, den kolaborashon ku Akademia Papiamentu, ta organisá un biaha mas Festival Kònta Bo Ko’. E proyekto ta dirigí na personanan di 21 aña bai ariba ku tin interes den skirbimentu, kontamentu di kuenta, teatro i presentashon. Ku e festival, e organisadónan ke stimulá talento nobo i promové uso di Papiamentu den un forma kreativo i moderno.
Un di e metanan prinsipal di e proyekto ta pa stimulá eskritornan nobo pa skirbi na Papiamentu. Ademas, e proyekto ke promové uso di dicho i proverbionan den storianan moderno i finalmente publiká un kolekshon di storia na Papiamentu. Di e manera aki, partisipantenan ta haña un oportunidat pa desaroyá nan kreatividat i talento, miéntras nan ta kontribuí na uso, konservashon i desaroyo di Papiamentu.
E proyekto ta konsistí di dos fase. Skirbimentu Kreativo ta e promé fase, kaminda partisipantenan lo enfoká riba kreashon i skirbimentu di nan propio storia. Konta Kuenta i Presentashon ta e di dos fase. Durante e fase aki, partisipantenan lo siña kon pa konta i presentá nan storia dilanti di públiko. Despues di e dos fasenan, tur e storianan lo wordu grabá den studio i produsí komo storia ouditivo.
Final di e proyekto ta e Festival di Storia “Bin Kònta Bo Ko’. Durante e festival, partisipantenan lo haña e oportunidat pa presentá nan storia dilanti di públiko. Tambe lo tin introdukshon di e storianan ouditivo i lansamentu ofisial di e buki ku e kolekshon di storia na Papiamentu.
Personanan ku tin 21 aña òf mas i ku tin interes pa partisipá por inskribí mandando un imeil na binkontaboko@gmail.com òf yamando/manda un mensahe na 790 0155. Despues nan lo risibí e formulario di inskripshon pa yena.
Ku Festival Kònta Bo Ko’, ACE Foundation i Akademia Papiamentu ta sigui kreando espasio pa talento nobo, kreatividat i literatura na Papiamentu. E proyekto ta brinda partisipantenan e oportunidat pa desaroyá nan talento, kompartí nan propio storia i na mes momento kontribuí na uso i desaroyo di nos idioma.