KRALENDIJK – Un delegashon di Boneiru ta partisipando aktualmente den e di 40 edishon di Seatrade Cruise Global, ku ta tumando lugá di 7 te na 10 di aprel 2025 na Miami Beach, Florida.
Meskos ku añanan anterior, Boneiru ta kompartí un stènt huntu ku e islanan ruman, Aruba i Kòrsou. E kolaborashon regional ta ofresé un oportunidad pa pone den kontakto ku aktornan importante den e industriya marítimo i di cruise, diskutí inisiativa i eksplorá strategianan pa futuro.
Boneiru ta wòrdu representá na Seatrade 2025 pa Elësier Angel, direktor interim di Tourism Corporation Boneiru (TCB), Günther Flanegin, haven meester, i Marlon Richardson, direktor di e Direkshon di Supervishon i Mantenshon.
Importante
Seatrade Cruise Global ta selebrá su di 40 edishon este aña i ta kontinuá siendo e plataforma mas importante pa profeshonalnan di cruise mundialmente. E Seatrade Cruise Portfolio ta inkluí ekshibishonnan global, konferensianan, eventonan di networking, premio i un variedat di mediaplatformnan ku ta kubri tur aspekto di e industriya di cruise i marítimo.