KRALENDIJK – Piskadónan lokal, deportistanan akuátiko i otro usuarionan di laman ta bati alarma pa e estado deteriorando di e rampanan di lancha (slipway) na Boneiru. Nan ta hasiendo un apelashon pa akshon inmediato den un karta djamars pa preservá i mehorá e instalashonnan esensial aki.
Rampanan di lancha ta indispensabel pa baha i saka boto na laman i tin un rol krusial den e peska, turismo marítimo i rekreashon na e isla.
Mantenimentu defisiente i aksesibilidat limitá ta krea riesgonan di seguridat i ta representá un amenasa tantu pa fuente di entrada tradishonal, komo pa aktividatnan turístiko. Asosiashon di Piskadó Piskabon ta invitá tur hende interesá den e topiko aki pa pa tuma akshon huntu.
Riba djaweps 15 di mei pa 6 ‘or i mei di atardi, lo tin un reunión na e ofisina di Piskabon, kaminda lo papia tokante e preokupashonnan i nan posibel solushonnan. Tambe a inisiá un petishon pa boga pa mehoramentu di e instalashonnan eksistente.
Medio ambiente vulnerabel
Piskabon ta enfatisá ku rampanan di lancha bon mantené no ta solamente protehá ekipo i hende, sino tambe ta kontribuí na e preservashon di e medio ambiente kostero vulnerabel di Boneiru.