AMSTERDAM – Buelo KL769 di KLM, ku a sali awe for di Amsterdam direkshon Aruba ku destinashon final Boneiru, ta transportá un pasahero hopi spesial: Billy Valentijn. Billy ta sufri pa basta tempu kaba di kontrakshonnan muskular severo i mester transport’é drumi – un reto logístiko ku a eksihí lunanan di preparashon.
Pa 1.55 pm ora lokal (7.55 am na Boneiru) e avion a lanta na Schiphol. Na bordo: un kama spesial trahá pa Billy. E adaptashon aki a eksigí ku mester a kita no ménos ku nuebe stul den e avion. Por a kita e stulnan aki na Schiphol so i lo pone nan bèk einan atrobe, loke ta nifiká ku KLM ta realisá e buelo di regreso awe nochi di Boneiru pa Amsterdam sin e stulnan ei.
E operashon a bini ku un preis supstansial. Boluntarionan a traha lunanan largu pa logra haña e sen ku tabatin mester. Na prinsipio a kalkulá ku e transporte lo a sali alrededor di 30.000 euro , pero finalmente e preis a bira un suma impreshonante di 39.000 euro. TUI no por a fasilitá e forma di transporte aki i Corendon no a reakshoná riba e petishon.
Billy Valentijn ta yega Schiphol. E buelo mes no ta bai sin tenshon. KLM a duna di konosé si dentro di e promé dos ora i mei di buelo – te 10.30 am ora lokal na Boneiru – Billy haña komplikashon, e ta bira bèk mésora pa Amsterdam. E salú di Billy ta na tur momento na promé lugá.
Gradesido pa e sosten
Apesar di no a alkansá e suma final ku tabatin mester e boluntarionan ta kontentu pa e sosten ku nan a risibí. Nan ta laga sa ku nan ta inmensamente gradesido pa e kontribushonnan finansiero ku a drenta i ta drenta ainda. Ounke un patronisadó anónimo a tuma e último parti di e gastunan pa su kuenta, e boluntarionan ta enfatisá ku kada dòler ta bonbiní. E no ta yuda solamente pa aliviá e donante generoso aki un tiki, pero tambe pa brinda Billy un fakansi mas komfortabel i inolvidabel posibel na Boneiru.
Boluntarionan Josefien (man robes), Manuela (man drechi) i un piloto di KLM (Michael) ta yuda Valentijn durante e biahe di su soño Si tur kos kana manera a plania, e avion ta aterisá na Boneiru den kareda di 8.05 pm. Einan ta ward’é un kaluroso bonbiní i e kuido ku e mester.Ku e buelo spesial aki ta mustra atrobe loke ta posibel, danki na esfuerso di boluntarionan embolbí i koperashon di kompanianan di aviashon. Ban spera ku pa Billy Valentijn e ta e komienso di un kapítulo nobo riba e isla ku solo. Bo tambe ke yuda Billy bin Boneiru? Bo por hasi donashon aki