DEN HAAG – Djamars Tweede Kamer a rechasá e moshon di PVV pa pone Boneiru bou di kuratela. Solamente 34 miembro di Kamer a sostené e proposishon pa ekskluí Kolegio Ehekutivo i Kolegio Insular i pasa responsabilidat pa gobernashon pa Representante di Reino. Un mayoria di Kamer no ta mira motibu pa dal e stap aki.
Miembro di Kamer Elmar Vlottes a entregá e moshon 8 di òktober durante tratamentu di presupuesto pa Relashonnan di Reino. E ta haña ku Kolegio Ehekutivo ta okupá su mes muchu hopi ku konfliktonan entre nan i ta papia di mal gobernashon. P’esei e ke pa Reino tuma e gobernashon di Boneiru.
Ademas di PVV, Groep Markuszower, Forum voor Democratie i miembro di Kamer Mona Keijzer tambe a vota pro pa e moshon. Nan tabata bon pa 34 voto. Pues e moshon no a haña mayoria.
Remarkabel ta ku partidonan manera PVV, Groep Markuszower i FVD apenas ta visibel den e komishon Relashonnan di Reino, pero si ta vota pa desishonnan drástiko.
Traspaso di gobernashon no ta posibel gewon asina
Durante e debate e sekretario di estado pa Relashonnan di Reino Eric van der Burg a enfatisá ku Boneiru ta un parti igual di Hulanda, ku un Konseho Insular ku ta skohé demokrátikamente i un propio gobernashon. Traspasá e gobernashon i pone Kolegio Ehekutivo bou di kuratela, no por bai gewon asina. Pa esei mester di un proposishon di lei.
E gabinete ke konsentrá su mes riba papia ku i sostené e gobièrnu lokal i traha palabrashonnan pa mehorashonnan konkreto. Van der Burg a anunsiá ku e ke papia ku Kolegio Ehekutivo kua stap ta nesesario pa mehorá e situashon gubernamental.
Sosten si pa mehorashon di fasilidatnan públiko
Un otro moshon tokante Karibe Hulandes si a haña ámplio sosten djamars último. E moshon di i Mikal Tseggai (PRO) i Dassen (Volt) ta pidi gabinete pa identifiká kua fasilidatnan públiko mester di mehorashon struktural i kon por finansiá e mehorashonnan ei.
E moshon a haña 117 voto na fabor. Ku esaki e Kamer a tuma desishon riba un resúmen di e invershonnan nesesario di e fasilidatnan públiko na Karibe Hulandes.
E resultado ta mustra ku den Tweede Kamer tin sosten si pa mehorashon struktural riba e islanan, pero insufisiente respaldo pa e proposishon pa pone e gobernashon ku ta skohé demokrátikamente bou di kuratela.