KRALENDIJK – E promé siklo di reunionnan di mesa di klima na Boneiru a terminá eksitosoamente. Durante lunanan di mart i aprel, mas ku 20 stakeholder a traha huntu pa identifiká e efektonan di kambio di klima riba e isla.
E konklushonnan di e proseso aki ta forma un base importante pa e Dokumento di Intenshon di Klima i eventualmente e Plan di Klima ku lo bai kompilá.
Partisipanten a skohe temanan manera awa, naturalesa, infrastruktura i biba, pero basta lihé a yega na konklushon ku tur e dominionan aki ta fuertemente interkonektá. Hopi stakeholder a partisipá den mas ku un seshon. Tambe na un di dos siklo, enfoká riba organisashonnan mas chikitu, a sigui ku éksito ku un total di 18 partisipante.
Na yüni lo sigui reunionnan den e bario, ku sosten di lider di bario, Akseso i polis di bario. Adishonamente, hóbennan lo wòrdu i eksplísitamente involukrá.
Laga bo bos wòrdu skuchá
Presidente di e mesa di klima, Nolly Oleana, ta yama habitantenan pa bin duna nan opinión: “Kambio di klima ta nos tur su problema. Huntu nos por traha riba un Boneiru habitabel i resiliente.”