KRALENDIJK – Konseho Insular di Boneiru siman pasá a adoptá un moshon di forma unánime pa mehorá e kondishonnan di trabou i deskanso di e tripulantenan di e barkunan di fruta venezolano.
E tripulantenan di e barkunan aki, ku semanalmente ta transporta bèrdura i fruta fresku pa e isla, aktualmente ta traha bandi di 36 ora sin deskanso. Nan ta sali anochi for di Venezuela, yega na Boneiru despues di 12 ora di biaha, deskargá nan karga durante e dia i bolbe bai mesun anochi.
Konseho Insular ta pidi awor pa gezaghèber ku urgensia i dentro di un término di maksimal 30 dia, tuma tur paso posibel i nesesario pa garantisá ku e tripulantenan di e barkunan di fruta por keda pasa anochi na Boneiru despues di deskargá. Esaki mester tuma lugá na un lokalidat sigur i digno unda nan por haña deskanso manera ser humano promé ku nan kuminsá nan biaha di retorno.
Rèspèt
Segun e Konseho Insular, sostenibilidat logístiko mester bai man den man ku rèspèt pa e hendenan ku ta kontribuí na e transpòrt di kuminda pa e isla.