KRALENDIJK – Candy Reino, ku ta biba na Boneiru ta komprometé su mes pa duna hóben- i tambe grandinan akseso na e mundu internashonal di moda. Via un koperashon ku Aruba Fashion Week i Doral Fashion Week e ta organisá e verano aki un kampo di entrenamento eksklusivo pa modelo na Miami, kaminda no solamente e aparensia ta para sentral, pero tambe kurashi.
“Mi ta kere ku Boneiru ta kan kan di talento. Tin asina hopi hende bunita, úniko ta kana rònt – mucha hòmber í mucha muhé – pero nan ta pensa hopi biaha ku no tin chèns pa nan. Mi ke trese kambio den esei, Reino ta konta ku hopi konvikshon.
E kampo di entrenamentu ta tuma lugá di 16 te ku 19 di yüli na Miami i ta ofresé partisipantenan di 8 aña i mas grandi un programa intensivo: entrenamento di pasarela, téknikanan di makiyahe, promoshon via media sosial, seshon di saka pòtrèt i partisipashon na shownan di moda profeshonal. “Bo no mester tin eksperensia. Bo ta bai pa siña, no pa presta. E no ta un kompetensia,” Reino ta enfatisá.
Bai huntu komo tim
Partisipantenan ta bini di Aruba, Kòrsou i Boneiru. Reino ta guia e grupo personalmente bai Miami. “Mi ke pa tur hende sinti su mes seif. P’esei mi tin kontakto ku kada partisipante i nan mayornan. Nos ta biaha huntu, drumi huntu den hotel – manera un tim.”
Kiko ta hasi e eksperensia aki asina spesial? Segun Reino e ret ta impagabel. “Bo ta bini den kontakto ku diseñadó-, stilista- i agensianan di entre otro Colombia, Estadonan Uní di Amérika i Europa. Sierto modelo ta haña akinan nan promé tareanan òf invitashon pa shownan grandi.”
Pa mucha tambe tin oportunidat. “Tin hopi marka ku ta buska mucha komo modelo. I si bo yu ta desfilá tur ora na kas, esaki ta e lugá perfekto pa deskubrí si e tin potensia.”
E programa ta parti di un vishon mas ámplio. Reino ta spera ku su esfuerso finalmente ta kondusí na un propio Bonaire Fashion Week. “Nos tin e nòmber, e estilo, e talento – awor falta e presupuesto i e sosten. Pero nos ta traha riba dje. Stap pa stap.”