KRALENDIJK - E aña aki, SKAL di Entidat Públiko Boneiru (EPB) a bolbe entregá Sambarku di Estímulo. Q’sheantely Martines i Natanael Melaan a risibí e rekonosementu akí pa motibu di nan talento, dedikashon i kontribushon na komunidat.
Un empuhe èkstra
Sambarku di Estímulo ta eksistí for di 2005 i a sali for di SKAL (Sekshon di Kultura, Arte i Literatura), den kooperashon ku Hubert Vis. E rekonosementu ta destiná pa hendenan di e komunidat boneriano ku ta dediká nan mes na yuda otro i ta hasi un kontribushon positivo na komunidat.
E Sambarku di Estímulo no ta solamente un apresio pa loke un hende a logra, sino tambe un estímulo pa sigui krese i sigui inspirá otro.
Q’sheantely Martines
Q’sheantely Martines ta un talento hóben polifasétiko riba tereno di baile, teatro, deporte, skirbimentu, kontamentu di kuenta (arte di presentashon). El a yega di representá Boneiru positivamente tantu lokalmente komo regionalmente i logra vários título i premio.
For di chikitu, e ta aktivo ku baile i deporte i ademas ta traha tempu pa yuda otro. Den su tempu liber e ta kompartí ku otro su talentonan i konosementu balioso. Na 2026 el a lanta su propio grupo di baile The Royal Dances, ku kua e ta guia i inspirá 23 mucha. Di e manera akí e ta kontribuí na desaroyo di talento i traspaso di kultura boneriano. Su famia a risibí e Sambarku di Estímulo na su nòmber.
Natanael Melaan
Natanael Melaan tambe ta kombiná vários talento. For di edat hóben e ta aktivo ku deporte i ta dediká tempu na músika i komposishon. Su pashon pa músika i komposishon a kondusí entre otro na partisipashon na Festival di Tumba. Ademas e ta guia i stimulá talentonan musikal hóben. E tambe den su tempu liber ta yuda otro kompartiendo su konosementu i talento.
Na 2024 el a lanta su propio banda pa kompañá muchanan musikalmente durante Festival di Tumba di Mucha. Su yu muhé Narghelly Melaan a gana e aña ei e kategoria hubenil ku e kantika ‘Rincon ta Gradisí bo’. Na 2026 durante Festival Kanta bo Boneiru a bolbe koroná un komposishon di Natanael. Juliendra Janga e gana e kategoria hubenil ku e kantika ‘E mensahe pa un mihó Boneiru’.
Un nochi bunita
Durante e entrega di Sambarku di Estímulo a para ketu na e trayektorio, desaroyo i prestashonnan di tur dos persona. Famianan, invitadonan i representantenan di EPB tabata presente.
Ku rekonosementu di Q’sheantely Martines i Natanael Melaan, SKAL ta kontinuá ku un tradishon ku a kuminsá mas di binti aña pasá: rekonosé talento, balorá dedikashon i stimulá hende pa sigui krese.