DEN HAAG - Mester traha mas riba prevenshon, kuido, sosten sosial i kuido pa hóben na Hulanda Karibense. Den e periodo ku ta tras di lomba a lansa hopi akshon, i den e tempu benidero, tin ainda mas na kaminda, asina Minister Mirjam Sterk (Kuido di Durashon Largu, Hubentut i Deporte) ta skibi djarason den un karta na Tweede Kamer. Pasonan mas aleu pa fasilidatnan di bon kalidat na Hulanda Karibense, ku ta di nivel ekivalente ku na Hulanda Oropeo, ta nesesario sigun gabinete.
Minister Sterk: “Na Hulanda Karibense nos mester yega na un nivel di fasilidatnan ku ta ekivalente na Hulanda Oropeo. P’esei ta importante pa duna mas atenshon na prevenshon, bon kuido, sosten i kuido pa hóben pa habitantenan di Boneiru, Sint Eustatius i Saba. Esaki ta pidi trabou na midí, pa motibu ku komo resultado di e eskala chikí di e islanan nos no por tuma ofer tur kos di Hulanda Oropeo eksaktamente. P’esei mes, den e periodo benidero lo mi traha duru riba esei, huntu ku e partidonan di kuido na e islanan i e Entidatnan Públiko.”
Mas atenshon pa prevenshon
Hopi afekshon króniko tin hopi di haber ku estilo di bida i ambiente di bida, i p’esei por prevení un parti importante di nan. Huntu ku e Entidatnan Públiko di Boneiru, Sint Eustatius i Saba, nos lo sòru di duna èkstra atenshon na esaki. Un ehèmpel di esei ta e kampaña NIX18 karibense ku a kuminsá resientemente na Saba i Sint Eustatius. Pronto, lo kuminsá ku e kampaña aki na Boneiru tambe, pa hasi mayornan i doñonan di tienda konsiente di e límite di edat di 18 aña pa konsumo di alkohòl. Ademas, den e aña ku ta tras di lomba, riba kada isla a renová lugánan di hunga, di moda ku muchanan por hunga i move einan di un manera seif.
Organisá kuido mas serka
Un kuido di promé liña fuerte ta importante pa un sistema di kuido ku ta aksesibel i ta funshoná bon. For di komienso di e aña aki, tur e ofisinanan di dòkter di kas na Boneiru ta kumpli ku un marka di kalidat (akreditá pa NHG, e asosiashon hulandes di dòkternan di kas) i lo sigui fortifiká e promé liña di kuido na Saba i Sint Eustatius mas aleu.
Kolaborashon regional ku otro instansianan di kuido ta esensial pa hasi kuido mas serka di kas posibel. E sentronan di salubridat na Saba i Sint Eustatius ta trahando huntu mas i mas ku e hòspital na Boneiru, di moda ku den futuro, lo por evaluá potrètnan di radiologia na distansia. Pa mehorá e akseso na kuido di emergensia pa pashèntnan na Saba i Sint Eustatius, lo kuminsá traha huntu ku Guadeloupe.
Traslado médiko
Pa motibu di e eskala chikí di e islanan, trasladonan médiko ta inevitabel. Tur aña, mas o ménos 7.000 traslado médiko ta tuma lugá, mayoria di kua ta bai bon. Na mes momentu, for di e investigashon di Nationale ombudsman ta bini dilanti ku pashèntnan ta eksperensiá difikultat den suministro di informashon i guia personal durante un traslado médiko i den tratamentu di keho.
P’esei a entamá diferente mehorashon, manera renobashon di e wèpsait www.zorgenjeugdcn.nl, mihó akseso telefóniko i un prosedura di keho mas aksesibel. Pa e periodo benidero lo tuma mas paso pa mehorá e servisio. Pa un bon suministro di informashon, e meta final ta pa logra un portal digital pa aseguradonan kaminda nan por sigui nan datonan i nan progreso. Tambe lo investigá kon por duna mas atenshon ainda na e prosedura di keho, i kon e aseguradonan por haña mas posibilidatnan di eskoho entre dunadónan di kuido kontratá den e parti karibense di Reino.