KRALENDIJK – Bintidos studiante di e estudio ‘Schoonheidsspecialist’ na MBO Boneiru a kuminsá ku e programa di emprendementu BeYourOwnBoss (BYOB). Ta trata di e di sinku edishon di e programa, organisá den kolaborashon ku Qredits Boneiru.
E programa a kuminsá dia 24 di ougùstùs i ta enfoká riba konosementu i abilidatnan práktiko ku ta nesesario pa kuminsá un negoshi. Durante e trayekto, e studiantenan ta traha entre otro riba desaroyo di un idea empresarial, investigashon di merkado, planifikashon finansiero i un ‘Business Model Canvas’.
Na final di e programa, kada participante mester presentá su idea empresarial i e plan finansiero korespondiente. E lèsnan ta ser duna pa empresario i Qredits Coach Sullivan Chin Fung Chun.
Pa MBO Boneiru, partisipashon den e programa ta un manera pa laga studiantenan sera konosí ku emprendementu i eksplorá si un propio negoshi por ta un opshon despues di nan estudio.
E programa BeYourOwnBoss ta un inisiativa di Qredits. E edishon aktual na Boneiru ta risibí sosten di Orco Bank i Ministerio di Asuntunan Ekonómiko i Klima.