KRALENDIJK - E kampaña Seif Huntu, Fuerte Huntu (Safe Together, Strong Together) ta drenta den un siguiente fase ku inisio di un kampaña digital públiko na Boneiru, Sint Eustatius i Saba. Habitantenan ta risibí informashon via medionan sosial tokante violensia doméstiko i maltrato di mucha, i tokante e sosten disponibel na e islanan.
Ku e kampaña, Kuido i Hubentut Hulanda Karibense (Zorg en Jeugd Caribisch Nederland) huntu ku e Entidatnan Públiko, ke sigui stimulá e kòmbersashon tokante seguridat i informá habitantenan tokante unda nan por akudí pa konseho i sosten na Boneiru, Sint Eustatius i Saba. No solamente ora nan ta dil ku un situashon nan mes, pero tambe ora un hende ta preokupá pa un miembro di famia, amigu, bisiña òf un otro persona den nan serkania.
Un parti importante di e kampaña ta testimonio grabá di habitantenan di Hulanda Karibense. Den e vidionan aki, habitantenan ta kompartí nan eksperensia personal ku violensia doméstiko òf maltrato di mucha. Dor di kompartí nan historia, nan ta spera di krea rekonosementu i kontribuí na fortifiká e poder di komunidat pa sostené otro.
“Hopi hende ta kere ku nan mester sa sigur kiko ta pasando promé ku nan por pidi konseho. Esei no ta e kaso, si bo tin duda, yama e punto di konseho”, asina René Clemencia, kolaboradó di maneho responsabel pa implementashon di e Kódigo di Protekshon na Hulanda Karibense ta bisa. “Ora algu no ta sinti bon, ora bo ta preokupá pa un hende òf simplemente ora bo tin pregunta, bo por tuma kontakto ku e punto di konseho riba bo isla. Bo no mester buska solushon pa bo inkietutnan bo so.”
Bo por pidi konseho di forma anónimo
E kampaña ta pone atenshon spesial na e Sentronan di Konseho pa Violensia Doméstiko i Maltrato di Mucha na Boneiru, Sint Eustatius i Saba. Tur hende por tuma kontakto pa informashon, konseho i sosten.
Un kòmbersashon ku un sentro di konseho por tuma lugá di forma anónimo i no ta kondusí outomátikamente na un relato òf trayekto formal. Spesialmente ora un hende tin duda, pregunta òf mester di konseho, un kòmbersashon por yuda pa haña mas klaridat tokante un situashon i posibel siguiente pasonan.
Sigui e kampaña
Den e próksimo lunanan, lo tin contenido pa medio di vidio, historia i mensahenan informativo riba medio social, ku lo yuda e habitantenan pa rekonosé señalnan di inseguridat mihó i sa unda nan por bai pa sosten.
Sigui Rijksdienst Caribisch Nederland riba Facebook i keda informá tokante e kampaña Seif Huntu, Fuerte Huntu.
Sentronan di Konseho pa Violensia Doméstiko i Maltrato di Mucha
Boneiru: Guiami
Tel: 0802 – 0802 disponibel 24/7
Wèpsait: https://www.meldpuntguiami.com/
Sint Eustatius: Statia Strong Support Hotline
Tel: +599 318 4837 disponibel 8 a.m. - 5 p.m.
Saba: Domestic Safety Point
Tel: +599 416 6936 disponibel 24/7
Den kaso di un menasa direkto òf inseguridat agudo, semper yama polis mesora.