KRALENDIJK – E awanan rònt Boneiru ta birando mas i mas intensivo ku dòbel kantidat di boto den e aña ku a transkurí. Esaki ta pone e outoridatnan lokal dilanti di retonan nobo riba tereno di siguridat i maneho di medio ambiente. Kapitan di haf Gunther Flanegin ta kompartí su bista riba e situashon aktual i e plannan pa futuro.
Flanegin ta splika ku e reglanan den e Parke Marino ta rígido, spesialmente ora ta trata tiramentu di anker i nabegá. “Den Parke Marino tin reglanan rígido pa medio ambiente i naturalesa,” e kapitan di haf ta bisa. “Tin sierto zona pa diferente aktividat, pero esakinan no ta bon marká tur ora. Nos ta trahando pa krea zonifikashon mihó ilustrá.”
Zonifikashon
Luna pasá a bolbe lanta e diskushon tokante zonifikashon. Na e sitio di buseo Something Special un boto a alkansá un sambuyadó. Esaki a sosodé den awa plat. E persona ku tabata stür e boto i ku tabatin mas ku 18 aña a sigui kore, pero despues di un ratu polis a logra lokalis’é.
“Loke ta importante pa menshoná ta ku e reglanan di kore duru òf poko poko no tin nada di haber ku awa kla òf awa skur. Ta un asosiashon di hendenan ku ta bisa esei. Loke ta importante pa sa ta ku e Parke Marino ta sigui te na un profundidat di 60 meter. Den e área aki tin reglanan spesial pa botonan. Pero esaki pues no tin nada di haber ku e koló di awa,” segun e kapitan di haf.
Konsientisashon serka usuarionan di laman
E oumento di boto tambe a kondusí na mas preukupashon pa siguridat, spesialmente pa hendenan ku ta landa i sambuyá. “E kantidat di boto a krese enormemente i hopi hende no konosé e reglanan,” segun Flanegin. E ta pone énfasis riba e importansia ku tur usuario di laman mester ta konsiente di i kumpli ku e reglanan.
Un punto importante di atenshon ta introdukshon di reglanan nobo i zonifikashon. “Nos ta trahando riba aktualisashon di e leinan, tin lei ku ta data di 1975 ainda,” Flanegin ta konta. “E meta ta pa ta kla ku e zonifikashon den 2025, di moda ku kada ken ta na altura unda nan por nabegá, landa òf sambuyá seif.” Ku un zonifikashon esun ku ta stür un boto sa mihó unda e mester nabegá. Un persona ku ta landa òf sambuyá tambe sa unda e por bai si òf nò.
Tambe a start un kampaña pa hasi usuarionan di boto mas konsiente di e reglanan vigente. “Nos ke pa personanan konosé e reglanan i ta tene nan mes na dje,” Flanegin ta bisa. “Na momento di falta ku e reglanan por hala pèrmitnan aden i duna but. Pa e motibu aki nos a tuma ámtenarnan den servisio ku den futuro ta bai buska personanan ku ta falta ku regla.
E esfuerso pa hasi e medio ambiente marítimo na Boneiru mas seif i mihó regulá ta kanando bon. Flanegin ta konkluí: “Zonifikashon ta esensial. Nos mester pèrkurá pa diferente aktividat no bini den konflikto ku otro, di moda ku nos por garantisá tantu naturalesa komo siguridat di tur usuario di laman. Sambuyadó, landadó i usuarionan di boto no mester drenta den kontakto ku otro na un manera peligroso.”