KRALENDIJK - Tourism Corporation Bonaire (TCB) a nombra Elesiër Angel komo direktur estatutario interim, entrante dia promé di yanüari 2025. Ku su nombramentu, Angel ta sigui den e pasonan di e direktor saliente Miles Mercera.
Segun un komunikado di prensa di TCB, Angel a kuminsá su karera den e sektor di turismo na un edat hopi yon di 12 aña. E direktor nobo tin, entre otro, un master den Tourism Destination Management di Universidat di Breda pa loke ta trata su formashon profeshonal.
For di su yegada na TCB na aña 2021, Angel a hunga un ròl importante den inishativa i strategíanan di e organisashon. Durante e kuater aña tras di lomba, Angel a traha di forma hopi estrecho ku Mercera, ku lo bandoná e organisashon na fin di desèmber 2024.
“Tabata un honor pa mi a liderá Tourism Corporation Bonaire i traha ku un ekipo asina talentoso den e kuater aña ku a pasa. Mi ta hopi orguyoso di e progreso ku nos a logra huntu, i di e base fuerte ku nos a krea pa e industria di turístiko di Boneiru. Mi tabata tin e privilegio di mira Elesiër Angel krese den e organisashon, i su pashon pa e ekipo, TCB i e industria di turismo di Boneiru. E konosementu profundo di Ely pa loke ta trata e identidat úniko di Boneiru, su manera inovativo di pensa i su dedikashon na turismo sostenibel ta hasi di dje e lider perfektu pa e siguiente kapítulo. Mi deseá e i e ekipo di TCB hopi eksito,” Mercera a bisa tokante e nombramentu.
Konfiansa
E hunta di komisario di TCB ta bisa ku e eskoho pa Angel ta bini despues di un proseso di selekshon ku ta alineá ku e prinsipionan di bon gobierno. “Nos tin konfiansa total den liderato i vishon di Elesiër, i nos ta wak dilanti pa sostené duna yudele sigui ku e kaminda eksitoso di TCB”.