BRIDGETON, Barbados - James Finies, líder di Pueblo Progresivo Uni i di Bonaire Human Rights Organization, tabatin e oportunidat di trese e kaso di Boneiru na atenshon di e Sekretario-General di Nashonan Uni, António Guterres, na e 48 Kumbre di CARICOM, ku ta tuma lugá na Barbados.
E kumbre di tres dia , di 19 pa 21 di Februari ta reuni Prome Ministernan di e región Karibense, Presidente di e Unión Europeo: Ursula von der Leyen, Sekretario-General di Commonwealth: Patricia Scotland, Sekretario General di Nashonan Uni: António Guterres i otro dignitarionan internashonal pa diskuti temanan importante di e region di Karibe.
E fokus prinsipal di Finies pa partisipá na e evento aki ta pa trese atenshon internashonal riba e situashon di Bonaire despues di 10-10-10 i boga pa derechonan i aspirashonnan di e pueblo Boneriano. Ademas presentá e retonan kontinuo di Bonaire ku ta empeorando pa e lokalnan na e plataforma di nivel mas haltu den Karibe, ku ta e Kumbre di Hefenan di Estado di CARICOM.
Esaki ta eksigí kompromiso firme, trabou duru i kurashi, pero Finies ta keda desidido den su mishon pa logra resultado I solushon signifikante pa ku e situashon di Boneiru.
“Esaki ta un oportunidat krusial pa nos bos yega na e nivel global i eksigí e rekonesementu i hustisia ku nos pueblo meresé,” Finies a bisa. “Nos ta determiná pa sigui lucha, sin importa e desafionan.”
Plataforma esensial
E diskushonnan na CARICOM lo sirbi komo un plataforma esensial pa e kausa di Bonaire. Kolaborashon internashonal ta fundamental pa atende ku e problema urgente di derecho humano i gobernashon di Boneiru ku despues e aneksashon illegal di 10-10-10 ta kai lew bao di minino standard di lei Internashonal I Nashonan Uni.