KRALENDIJK – Djaweps anochi tabatin e promé Mesa di Klima na Boneiru, un enkuentro kaminda a trese temanan importante dilanti pa loke ta trata kambio di klima i sostenibilidat riba e isla. Ku un sala yen i personanan prominente presente a bira evidente ku e tópikonan aki ta hunga un ròl urgente riba e isla.
Gezaghebber John Soliano, diputadonan Anjelica Cicilia i Nina den Heyer, meskos ku representantenan di por ehèmpel Stinapa, kompania di awa i elektrisidat Boneiru, Piskabon i delegado spesial Edison Rijna, tabata presente na e promé Mesa di Klima. Vários oradó a enfoká riba problemanan di klima ku por afektá Boneiru direktamente
Kambionan chikitu ta yuda
Pedzi Girigori, Chief Operations Officer di Departamentu Meteorológiko Kòrsou, a tene un charla inspirativo tokante e konsekuensianan direkto di kambio di klima na Boneiru. El a enfatisá ku kambio di klima no ta pará los di asuntunan sosial: “Tur problema sosial ku nos tin, ta bira pió ku kambio di klima. E promé stap pa un futuro mas sigur ta pa enfrentá e problemanan aki.”
Tantu gobièrnu komo e pueblo mester ta mas konsiente di su eskohonan, Girigori ta bisa. “Dikon nos ta buska palu di pasku for di eksterior enbes di planta palu na Boneiru? Pakiko no kome ménos karni i redusí sushi? Kambionan chikitu por hasi un diferensia grandi.”
Tambe a papia di e ròl di gobièrnu. “Maneho ta efektivo solamente ora e suidadanonan ta pará su tras,” Girigori ta spièrta. El a mustra ku Boneiru no por para kambio di klima, pasobra esaki ta dependé di paisnan industrial grandi. I maske un pais grandi manera Estadonan Uní di Amérika no ke koperá mas pa kombatí kambio di klima, Girigori a keda positivo pa elaborá riba e plan si. “Pasobra nos por prepará nos mes si riba e eventual konsekuensianan.”
Di konsientisashon pa akshon
Presidente Nolly Oleana a enfatisá ku Mesa di Klima no ta papia solamente di konsientisashon, pero tambe di akshon. “Nos a hinka hopi tempu den preparashon i a hiba kòmbersashon ku instansha- i ekspertonan. Awor e trabou mes ta bai kuminsá.”
El a suprayá ku no ta gobièrnu so ta responsabel, pero tambe siudadanonan, Hulanda i Union Europeo. “Tur hende mester kontribuí. Bo ta konstruí un kas? Pèrkurá pa un bon isolashon. Planta palunan den bo kurá. Tene e isla limpi.”
Tambe el a menshoná e ròl di Hulanda den e proseso aki. “Wes na Hulanda ta duna un veredikto riba 7 òf 8 di òktober tokante un kaso ku Greenpeace a entamá kontra estado . E veredikto ei lo ta deteminá kon lihé Hulanda ta tuma akshon. Nos ta traha den koperashon estrecho ku departamentunan Hulandes pa pèrkurá ku Boneiru ta haña e sosten ku e mester.”
Pédzi Flores-Girigori ta kere ku kambionan chikitu por hasi e diferensia.
Intenshon di klima na kaminda
E enkuentro a marka solamente e komienso di un trayekto largu. Riba 13 di mart ta start ku e kòmbersashonnan di mesa, kaminda diferente grupo di habitante i organisashon ta formulá huntu solushonnan. “E trayekto aki ta úniko pa Boneiru. Nos ke pa tende tur hende i ta konstruí huntu un futuro sostenibel. Promé ku e veredikto na òktober nos no ta bini ku un plan ainda. Sí nos ta bini ku un intenshon di klima. Nos ta purba di kaba ku e plan pa fin di aña,” segun Oleana.
Un momento remarkabel tabata un pregunta di públiko tokante e idioma di uzo durante e enkuentro. Dikon a papia na Hulandes i no na Papiamentu? Presidente Nolly Oleana a duna un kontestana kla: “Mas ku 90% di esnan presente ta papia Hulandes. P’esei nos a skohe pa e idioma aki. Pero ora nos ta papia ku personanan di abla Spañó, nos ta uza Spanó. I si un grupo ta preferá di papia Papiamentu, nos ta adaptá nos mes na esei.” Ku un sala yen, oradónan inspirativo i komo despedida un palu chikitu ku e bishitantenan por planta den nan propio kurá, e Mesa di Klima tabata un stap eksitoso den oumentá konsientisashon i prepará Boneiru pa e retonan di kambio di klima.