Empleadonan di brantwer Boneiru ta entregá karta ku keho na mando di BKCN

KRALENDIJK- Riba djaluna atardi empleadonan di brantwer Boneiru, representá pa e sindikatonan Straf ku Acom a entregá un karta di keho na komandante di BKCN na Boneiru, Thijs Verheul.

E empleadonan, na momento di e entregá e karta a splika ku ya pa basta tempu tin sierto malkontentu ta reina bou di e empleadonan i ku ta yega un punto ku no por sigui asina mas. Despues di esaki a entregá e karta, ku e súplika pa bini ku un kontesta dentro di 7 dia. 

Ounke no a splika na prensa presente eksaktamente kiko e kehonan ta, ta komprondé ku ta trata di vários topiko i ku e karta ta represent kehonan spesífikamente di e empleadonan di BKCN na Boneiru, i e karta no a keda entregá na nòmber di koleganan na St. Eustatius i Saba, ku tambe ta kai bou di BKCN. 

Aksidente

Sinembargo, un di e kehonan ta netamente relatá na un kaso ku a tuma lugá na Saba ku un empleada di BKCN i, segun e sindikatonan a indiká, no a wòrdu manehá manera debe ser. 

Awor ta di mira kon mando di BKCN lo bai kontestá e karta ku keho pa wak si esaki ta kumpli ku espektativa di e empleadonan òf ku e konflikto potensial lo sigui eskalá.