KRALENDIJK – Riba e tereno na Stadion di Playa un kònteiner intermodal a bòltu djamars mainta. No tabatin herido. E insidente ta hasi e preshon mas grandi pa desokupá e tereno di stashoná outo, ku ta usando pa basta tempu kaba ilegal pa almasenahe.
Ya pa basta tempu kaba ta usa e tereno di stashoná outo na Stadion di Playa komo sitio di almasenahe pa kònteiner, trailer i ekipo pisá. Esei no ta su destino: e ta tereno públiko, destiná pa stadion i su fasilidatnan di stashoná outo.
Presensia di konteiner i ekipo pisá na e sitio ta trese riesgo pa habitantenan, usuarionan di kaminda, deportista- i otro bishitantenan. E insidente di djamars mainta ta mustra bon kla ku mester tuma e riesgonan ei na serio.
Evakuashon den fase
Servisio di Supervishon i Mantenshon (DT&H) a prepará un proseso di rekuperashon i evakuashon den fase. Inspektornan tabata na e sitio pa evaluá e situashon i e riesgonan di seguridat.
Yamada na doño- i usuarionan
Entidat Públiko Boneiru (EPB) ta hasi un yamada urgente na doño- i usuarionan ku tin produktonan riba e tereno pa kolaborá urgentemente pa un evakuashon seif. Mester kordiná delantá ku DT&H via +599 790 0707.
DT&H ta tene supervishon riba e tereno i ta keda informá kon e evakuashon ta desaroyá.