KRALENDIJK – Djasabra 12 di sèptèmber Kiri Thodé Adventures i D’s Organisation ta bai organisá huntu Bonaire Ocean Festival na Kas di Regata. E evento ta enfoká riba sesenta mucha entre 7 i 10 aña, ku ta bai sera konosí ku piskamentu, tantu den teoria komo den práktika riba awa.
E guia ta den man di Kiri Thodé, anterior wensùrfista profeshonal i kampion mundial. Thodé a lanta na Playa Pabou i komo mucha a siña piska serka su welo i su tio. Huntu ku Vanessa Isaza di D’s Organisation e ke duna muchanan riba e isla e oportunidat pa deskubrí talento- i pashonnan nobo.
E organisadónan ta enfatisá ku e festival t’ei pa henter isla. Ta invitá famianan pa bin gosa huntu di e dia, tambe si nan yunan no ta partisipá na e programa di mucha mes.
Bonaire Ocean Festival ta tuma lugá riba 12 di sèptèmber 2026 na Kas di Regata. E programa di mucha ta pa muchanan di 7 te 10 aña. Por inskribí, haña mas informashon i hasi reservashon pa kiosko di kuminda via number di telefon +599 770 3558.
Entidat Públiko Boneiru, Indebon, Prins Hendrik Stichting, Bonaire Sailing School Association, Pier 2, Karel’s Beach Bar, Gunlis, Mr. Sweeper i Sun J.M. Maintenance N.V. tambe a kontribuí pa hasi e festival posibel.