KRALENDIJK – Di 10 te ku 15 di sèptèmber Fundashon Kuerpo Mayoreta Unity ta biaha pa Aruba. E delegashon di 35 persona - 23 mayoreta, 6 miembro di direktiva i shete kompañante - ta representá Boneiru durante selebrashon di Dia di Boneiru.
Unity tin tres presentashon: na skolnan i un presentashon públiko durante Dia di Boneiru. Pa e organisashon e biahe ta mas ku un presentashon. Boneiru tin e úniko kuerpo di mayoreta aktivo dentro di islanan BES i CAS i esei ta hasi e delegashon representante di tur e islanan.
Un organisashon hóben ku un meta grandi
Unity a lanta 16 di aprel 2026 i a logra den korto tempu pa trese hóbennan, mayornan, direktiva i komunidat huntu via un BBQ bon bendí i un aktividat di spònser kreativo kaminda a parti un avion simbólikamente den pida pida i ku persona-, organisashon- i empresanan por a kumpra.
Pa Unity mayoreta ta mas ku kana marcha, twirl i presentá. E ta un medio pa siña hóbennan disiplina, rèspèt, traha den tim i liderasgo.
Aruba ta e promé stap
Aruba ta pa Unity komienso di un plan mas grandi. Despues di Aruba Kòrsou ta riba lista. Den futuro Unity ke bai Surnam tambe, e pais kaminda e organisashon tin su orígen.
Unity ta biaha ku orguyo, disiplina i rèspèt, i ku ún meta: representá Boneiru i laga region sera konosí ku e talento di hóbennan Boneriano.