KRALENDIJK - Bonaire Innovation & Technology Lab (BIT-Lab) ta organisá Ban Topa, edishon na Boneiru riba djabièrnè
11 di sèptèmber 2026. Durante e enkuentro aki, hóbennan Boneriano, studiante, hoben profesional, empresario i pensadónan kreativo lo bini huntu pa interkambiá idea i pensa huntu tokante futuro di Boneiru.
Hóbennan lo tin e oportunidat pa duna nan input i asina forma parti di e proseso di formulashon di maneho i e proseso di tuma desishon. Na lugá ku gobièrnu ta traha maneho i beleid pa hóbennan, nos ke stimulá gobièrnu pa traha riba maneho i beleid huntu ku hóbennan.
Ban Topa a wordu organisá anteriormente na Hulanda pa konektá hóbennan i profesionalnan Boneriano na Hulanda ku otro i ku e desaroyo di nos isla Boneiru. Ku e edishon lokal aki, BIT-Lab ta trese e konsepto na Boneiru mes, pa por haña un mihó bista riba e retonan aktual i puntonan di desaroyo segun hóbennan mes.
Tur idea i eksperensia ta konta
Durante e evento, hóbennan lo haña espasio pa kompartí nan idea, eksperensia, preokupashon i solushon tokante temanan ku nan ta konsiderá importante pa futuro di Boneiru. No ta solamente temanan proponé dor di gobièrnu lo ta sentral. Hóbennan mes tambe por pone temanan riba agenda ku, segun nan, mester haña mas atenshon. Pa asina trese dilanti na gobiernu.
Tur tema den nos komunidat por bini dilanti: for di enseñansa, bibienda, trabou i inovashon te na kultura, salú mental i otro temanan ku tin influensia riba bida i futuro di hóbennan Boneriano.
BIT-Lab lo kolektá tur e input di hóbennan i huntu ku e hóbennan, por èhèmpel pa medio di un panel òf interviews/investigashon, uza esaki den konseho i rapòrt konkreto pa gobiernu. Aktualmente BIT-Lab ta trahando riba un konseho tokante kon pa konservá i fortalesé kultura na Boneiru. Un siguiente tema lo enfoká riba di dje lo ta por èhèmpel salú mental.
Di e manera aki, BIT-Lab ke forma un brùg entre hóbennan i esnan ku ta formulá maneho: no solamente konsultá hóbennan tokante maneho ku ya ta den desaroyo, sino tambe duna nan e espasio pa nan mes trese temanan, nesesidatnan i ideanan dilanti.
No solamente maneho pa hóbennan, sino maneho huntu ku hóbennan. Temanan na Boneiru
Durante Ban Topa Boneiru, partisipantenan lo papia ku otro tokante, entro otro, temanan manera:
● Enseñansa i oportunidatnan di karera: den kiko hóbennan ta topa ku obstákulonan i kiko, segun nan, ta nesesario pa nan por sigui desaroyá nan mes i krea oportunidatnan na Boneiru?
● Inovashon i teknologia: kua ta e ideanan ku hóbennan tin tokante inovashon i teknologia, i kon esakinan por yuda na buska solushonnan pa retonan lokal?
● Bibi, traha i futuro na Boneiru: kon studiante, young professionals i hóbennan empresario ta eksperensiá bida i oportunidatnan riba e isla? Kiko ta nesesario pa hasi Boneiru un lugá kaminda hóbennan por i ke konstrui nan futuro?
● E diaspora Boneriano: kiko ta nesesario pa tene hóbennan ku ta studia òf traha pafó di Boneiru konektá ku e isla? I pa esnan ku ke bolbe, kon por hasi e paso pa regresá mas atraktivo i hasi esaki algo realistikó?
“Boneiru tin hopi talento hóben, konosementu balioso i ideanan inovativo. Ku Ban Topa nos ta krea un lugá kaminda e personanan aki por topa otro i kaminda por desaroyá konsehonan nobo i inovativo, pa un Boneiru mihó, ” segun Anthony Janga.
Hóbennan di Boneiru, pa Boneiru
E enkuentro ta dirigí spesialmente na studiante, young professionals i otro hóbennan ku ke kontribuí na desaroyo di Boneiru. Kuriosidat, inbolbimentu i konekshon ku Boneiru i e disposishon pa kompartí idea ta sentral.
Informashon práktiko
Evento: Ban Topa
Fecha: djabièrnè 11 di sèptèmber 2026
Ora: Entrada 18:30 | Kuminsamentu 19:00 – 21:00
Lugá: Jong Bonaire
Partisipashon: Grátis
Registrashon: https://forms.gle/hMXJuL2uakxeE82p8
Tokante BIT-Lab
BIT-Lab (Bonaire Innovation & Think Tank Lab) ta un inisiativa di hóbennan Boneriano ku ta reuni i kontektá hóbennan na Boneiru i diaspora Boneriano pa pensa i kontribuí huntu na futuro di nos isla stimá Boneiru.
BIT-Lab ta fungi komo un plataforma kaminda hóbennan por investigá kuestionnan sosial, kompartí konosementu i desaroyá rekomendashonnan konkreto pa gobièrnu, organisashonnan sosial i otro stakeholdernan.
Bo ke mas informashon tokante e evento Ban Topa òf BIT-Lab?
Tuma kontakto via: Info@bit-lab.nl òf manda un mensahé via instragram; Bonaire_Innovationlab